ҶАМЪОВАРИИ ҲОСИЛИ ПАХТА ДАР В.ХАТЛОН БО МАРОМ ИДОМА ДОРАД
Соли ҷорӣ бо дастгирии Ҳукумати Ҷумҳурии Тоҷикистон аз ҷониби Муассисаи давлатии “Рушди соҳибкорӣ дар соҳаи кишоварзӣ” ҷиҳати татбиқи лоиҳаи «Баланд бардоштани устувории кишоварзӣ» дар мавсими кишти пахта навъҳои чигити хушсифати дорои сертификати тухмии пахтаи гурӯҳи элитаи Ҷонгмян-113, Лазер ва Рамсесро дастраси кишоварзони вилояти Хатлон (баҳрагирандагони лоиҳа) гардида буд.
Кишоварзон аз ин дастгириҳои пайвастаи Ҳукумати Ҷумҳурии Тоҷикистон ва Муассисаи давлатии “Рушди соҳибкорӣ дар соҳаи кишоварзӣ” қаноатманд гардида, кишти пахтаро дар майдони 3590 га сари вақт ба роҳ монданд. Навъҳои дастрасгардида аз хориҷи кишвар ворид гадида, серҳосил ва ба шароити иқлиму тағйирёбии он мутобиқ буда, ба хоҷагиҳои ниёзманд ва тухмипарвар равона гардидааст.
Айни ҳол дар шаҳру ноҳияҳои вилояти Хатлон дастаҷамъона чиниши пахта бо маром идома дошта, кишоварзон бо риояи агротехникаи парвариш тавонистанд ҳосилнокии пахтаро баланд бардошта, дар чиниши якум аз 13 то 18 с/га ҳосили хуб ба даст биёранд.
Баҳрагирандагони лоиҳа кӯшиш доранд, ки аз ҳавои мусоид самаранок истифода намуда, дастаҷамъона ҳосили дар соҳробударо беталаф ва сари вақт ҷамъоварӣ намоянд ва ҳосилнокии онро то ба 50-55 с/га расонанд.
