ДАСТГИРИИ ХОҶАГИҲОИ ДЕҲҚОНИИ НИЁЗМАНД ДАР МИНТАҚАИ РАШТ ВА ВМКБ
Соли ҷорӣ бо дастгирии Ҳукумати Ҷумҳурии Тоҷикистон аз ҷониби Муассисаи давлатии “Рушди соҳибкорӣ дар соҳаи кишоварзӣ” дар доираи лоиҳаи “Баланд бардоштани устувории кишоварзӣ” ҷиҳати беҳтар намудани заминаи моддию техникии хоҷагиҳои ниёзманди кишвар 150 адад тракторҳои хурдҳаҷм, бо таҷҳизотҳояшон ва 250 адад мотоблок бо ядакҳо, кулӯхмайдакунак (фрейзер), картошкашинонаку картошкаканак ва таҷҳизоти шудгоркунанда дар миқёси ҷумҳурӣ дастраси хоҷагиҳои ниёзманд гардид.
Айни ҳол дар қатори дигар шаҳру ноҳияҳои кишвар ин иқдом дар хоҷагиҳои ниёзманди минтақаи Рашт ва ВМКБ амалӣ гардида истодааст.
Дар маросими супоридани мошинолотҳои кишоварзӣ дар якҷоягӣ бо ҳайати комиссия роҳбарияти Мақомоти иҷроияи ҳокимияти давлатии шаҳри ноҳияҳои минтақаи Рашт иштирок намуда, бо тантана дастраси хоҷагиҳои ниёзманд гардонида шуд.
Ҳамчунин ин иқдом дар ВМКБ маросими идона гирифта, дар он раиси вилоят дар якҷоягӣ бо раисони шаҳру ноҳияҳои вилоят ва ҳайати комиссия дар фазои тантанавӣ калиди техникаҳоро ба сардорони хоҷагиҳои ниёзманд супориданд.
Зимни суханронӣ ӯ иброз намуд, ки ҳамасола бо дастгирии Ҳукумати Ҷумҳурии Тоҷикистон аз ҷониби Муассисаи давлатии “Рушди соҳибкорӣ дар соҳаи кишоварзӣ дар доираи “Лоиҳаи баланд бардоштани устувории кишоварзӣ якқатор техникаву мошинолот ва тухмиҳои хушсифати зироатҳои кишоварзиро, ки дорои сертификат аст дастраси хоҷагиҳои тухмипарвар ва ниёзманди шаҳру ноҳияҳои вилоят гардида истодааст, ки боиси ифтихори ҳар як кишоварзи вилоят мебошад.
Қобили зикр аст, ки соли ҷорӣ низ аз ҷониби муассисаи мазкур 15 адад трактори хурдҳаҷм ва 25 адад мотоблок ба таҷҳизотҳояшон дастраси хоҷагиҳои ниёзманди шаҳру ноҳияҳои вилоят гардид, ки барои кишоварзон дастгирии бениҳоят хуб мебошад.
Имрӯзҳо кишоварзон (Баҳрагирандагони лоиҳа) аз дастгириҳои пайвастаи Ҳукумати Ҷумҳурии Тоҷикистон қаноатманд гардида, тасмим гирифтаанд, ки барои афзун гардонидани ҳосилнокии зироатҳои кишоварзӣ камари ҳиммат баста, дар таъмини амнияти озуқавории кишвар низ саҳмгузор мебошанд.
