Ҷамъоварии картошкаи тухмӣ дар ноҳияи Рашт

Бо дастгирии Ҳукумати Ҷумҳурии Тоҷикистон Муассисаи давлатии “Рушди соҳибкорӣ дар соҳаи кишоварзӣ” дар доираи лоиҳаи “Баланд бардоштани устувории кишоварзӣ” соли ҷорӣ тухмии картошкаи хушсифати дорои сертификати гурӯҳи элитаи навъҳои «Эволюшен», «Пикассо» ва «Аризона»-ро барои хоҷагиҳои ниёзманд ва тухмипарвари кишвар (баҳрагирандагони лоиҳа) дастрас намуд.

Бо мусоид омадани боду ҳавои имсола ва риояи саривақтии агротехникаи парвариш ҳосилнокии зироатҳо махсусан картошка дар манотиқи ҷумҳурӣ хуб гардида, айни ҳол дар ноҳияҳои назди кӯҳӣ ҷамъоварии он бо маром идома дорад.

Мутахассисони соҳа санаи 09.10.2024 дар рафти ҷамъоварии ҳосили картошка аз хоҷагиҳои деҳқонии “Аброр”, “Парвиз”, “Хост”, “Бахт” ва “Файз”-и ноҳияи Рашт дидан намуданд, ки нисбат ба соли гузашта ҳосилноки имсол хело хуб буда, кишоварзон аз он қаноатманданд.

Соли ҷорӣ мутахассисони муассиса дар рафти апробатсия (муайян намудани ҳосили интизорӣ) маълум намуда буданд, ки ҳосили имсола дар ҳудуди кишвар хеле хуб буда, барои таъмини амнияти озуқаворӣ ва рушди соҳаи тухмипарварӣ қадамҳои устувор мегузорад.

Ҳамчунин дар рафти сафари хизматӣ мутахассисони муассиса ҷиҳати сари вақт ва беталаф ҷамъоварии ҳосил ва тарзи дурусти нигаҳдорию захира дар анбор ба кишоварзон тавсияҳои судманди илмӣ пешниҳод намуданд.