СЕМИНАРИ ОМӮЗИШИИ «ТАБИБОНИ ХОК» ДАР НОҲИЯИ ДАРВОЗИ ВИЛОЯТИ МУХТОРИ КӮҲИСТОНИ БАДАХШОН
Муассисаи давлатии “Рушди соҳибкорӣ дар соҳаи кишоварзӣ” дар якҷоягӣ бо Созмони озуқаворӣ ва кишоварзии Созмони Милали Муттаҳид дар Ҷумҳурии Тоҷикистон (ФАО) соли ҷорӣ дар доираи лоиҳаи “Баланд бардоштани устувории кишоварзӣ” семинари омӯзишии “Табибони хок”-ро дар миқёси кишвар баргузор намуда истодааст.
Ин навбат семинари омӯзишӣ дар толори Мақомоти ҳокимияти давлатии ноҳияи Дарвози ВМКБ баргузор гардид. Сараввал семинари омӯзиширо раиси ноҳияи Дарвоз Носирзода Умедҷон оғоз намуда, ин ин чорабиниро иқдоми неку саривақтӣ аз ҷониби Муассисаи давлатии “Рушди соҳибкорӣ дар соҳаи кишоварзӣ” хонд. Сипас аз ҷониби олимону мутахассисони соҳаи хокшиносӣ масъалаҳои мубрами соҳа мавриди баррасӣ қарор гирифт.
Семинари мазкур ду рӯз 26 ва 27 — уми августи соли ҷорӣ идома ёфта, аз ҷониби олимони соҳа тибқи нақша дар саҳро тавассути таҷҳизотҳои муоссир элеметҳои гуногуни дар таркиби хокбуда ва ҳолати воқеии таркиби он муайян карда, пешниҳоди иштирокчиён гардонида шуд.
Баромадҳо оид ба масъалаҳои муайян намудани таркиби химиявию физикавии хок, ҳолати баландсозии структураи таркиби он ва доираи васеи мавзӯъҳои муҳимро тавассути як силсила рунамоҳо (презентатсияҳо) барои татбиқи стратегияҳои омӯзиш ва ҳифзи ҳамгироёнаи хок фаро мегирифт.
Ҳадаф аз баргузории чунин семинарҳои омӯзишӣ ин сари вақт омода намудани мутахассисони соҳа дар ҳалли мушкилоти ҷойдошта, истифодаи технологияи муоссир дар рафти фаъолияти имрӯзаи соҳа, истифодаи самараноки замин, тавассути таҷҳизотҳои муосир муайян намудани элементҳои таркиби хок ва боз ҳам баланд бардоштани ҳосилнокии зироатҳои кишоварзӣ мебошад.
Чорабинии мазкур барои мутахассисони соҳаи кишоварзӣ роҳандозӣ гардида, бо истифода аз технологияҳои муосир метавонанд донишу малакаи хешро боз ҳам мукаммал гардонанду дар оянда татбиқи илмро дар амал ҷорӣ намоянд.
Дар рафти семинар иштирокчиён роҷеъ ба масъалаҳои мубрами соҳа ба масъулин суолҳо пешниҳод намуда, нозукиҳои илми хокшиносӣ ва агрохимияро аз бар намуданд.
Анҷоми семинар барои ҳар як иштирокчи лаҳзаи ҷолибу хотирмон буд. Зеро онҳо тавонистанд дар натиҷаи аз бар намудани нозукиҳои ташхиси хок соҳиби сертификати “Табибони хок гарданд.
