ҶАМЪОВАРИИ ҲОСИЛИ ПАХТА ДАР ВИЛОЯТИ СУҒД

Кишоварзони вилояти Суғд аз ҳавои мусоид самаранок истифода намуда, дастаҷамъона ба ҷамъоварии ҳосили имсолаи пахта вусъат мебахшанд.

Қобили зикр, ки соли ҷорӣ Муассисаи давлатии “Рушди соҳибкорӣ дар соҳаи кишоварзӣ” ҷиҳати татбиқи лоиҳаи «Баланд бардоштани устувории кишоварзӣ» дар мавсими кишти пахта ба кишоварзони вилоят (Баҳрагирандагони лоиҳа) ба хоҷагиҳои тухмипарвар ва секторҳои хусусӣ навъҳои чигити хушсифати дорои сертификати гурӯҳи элитаро дастрас намуда буд. Кишоварзон тавонистанд дар натиҷаи риояи дурусти агротехникаи парвариш нашъунамои ин зироатро хуб ва ҳосилнокиаш фаровон гардонанд.

Айни ҳол дар шаҳру ноҳияҳои вилоят дастаҷамъона чиниши пахта бо маром идома дошта, онҳо тавонистанд дар чиниши аввал аз 13 то 16 с/га ҳосили хуб ба даст биёранд.

Баҳрагирандагони лоиҳа кӯшиш доранд, ки дастаҷамъона ҳосили дар соҳробударо сари вақт ва беталаф ҷамъоварӣ намуда, ҳосилнокии онро то ба 45 — 50 с/га расонанд.