Ташрифи мушовири байналмилалӣ оид ба рақамикунонии самти харитасозии замин

Бо дастгирии Ҳукумати Ҷумҳурии Тоҷикистон имрӯзҳо соҳаҳои гуногуни хоҷагии халқ махсусан соҳаи кишоварзӣ низ давра ба давра рушд намуда, ба дастовардҳои назаррас ноил гардида истодааст.

Муассисаи давлатии “Рушди соҳибкорӣ дар соҳаи кишоварзӣ” дар доираи лоиҳаи “Баланд бардоштани устувории кишоварзӣ” ҷиҳати таҳкими иқтидори соҳаи кишоварзӣ пайваста тадбирҳои зарурӣ меандешад.

Ҳафтаи ҷорӣ дар доираи компоненти 3 — и лоиҳаи “Баланд бардоштани устувории кишоварзӣ” мушовири байналмилалӣ ҷаноби Мехмет Эрдогду ташриф оварданд.

Мақсади ташрифи мушовири байналмилалӣ аз санаи 13 то 16 -уми январи соли ҷорӣ ҷиҳати ба роҳ мондани рақамикунонии соҳаи харитасозии замин, тавассути сармоягузорӣ ба кӯмаки техникӣ, хариди таҷҳизоти зарурӣ, таъмини барномаҳо ва рақамикунонии иттилооти харитаи замин ва хок мебошад.

Сараввал аз ҳолати кунунии озмоишгоҳҳо ва самти харитасозии Институти хокшиносӣ ва агрохимияи АИКТ дидан намуда, сипас мулоқоти корӣ бо роҳбарияти институт ва якқатор кормандони соҳа анҷом дода шуд.

Дар рафти мулоқот масъалаҳо оид ба таҷрибаҳои ҷории харитасозии хок, гузаронидани таҳлили техникӣ ва потенсиали муассисаи илмӣ таҳлилҳо, таҳияи нақшаи баланд бардоштани иқтидор дар харитасозии хок, шартҳои техникии рақамикунонии харитаҳои хок дар асоси талаботи лоиҳа ва муайян намудани таҷҳизоти зарурӣ барои пешбурди кор мавриди баррасӣ қарор гирифт.